Кәсіпкерлікті дамыту жөніндегі мемлекеттік саясаттың тиімділігін бағалаудың әдіснамалық тұрғылары: салыстырмалы талдау және Қазақстан үшін қорытындылары

Аңдатпа

Мақалада кәсіпкерлікті дамытуға бағытталған мемлекеттік саясаттың тиімділігін бағалаудың теориялық-әдіснамалық негіздері қарастырылады. Зерттеудің мақсаты - дамыған және өтпелі экономикаларда қолданылатын негізгі бағалау шеңберлері мен көрсеткіштерін айқындап, оларды Қазақстан жағдайында бейімдеу талаптарын негіздеу. Әдіснамалық базаға институционалдық, жүйелік және кәсіпкерлік экожүйе тұрғылары, сондай-ақ нəтижеге бағдарланған басқару логикасы (input-output-outcome-impact) кіреді. Салыстырмалы және институционалдық талдау, бағдарламалық және нормативтік құжаттарға контент-талдау әдістері қолданылған. ОЭСР елдерінің тәжірибесі негізінде сандық және сапалық индикаторларды үйлестіретін, бағалауды мемлекеттік басқару цикліне кіріктіретін және оның нәтижелерін қолдау құралдарын түзету үшін пайдаланатын модельдер жинақталған. Зерттеудің ғылыми жаңалығы - мемлекеттік саясатты бағалауды кәсіпкерлік экожүйе призмасы арқылы жүйелеу және Қазақстанда кәсіпкерлікті мемлекеттік қолдаудың тиімділігін мониторингтеу мен бағалаудың ұлттық тұжырымдамалық қаңқасын қалыптастыру бойынша ұсыныстар беру.